മണിമലയിൽ നിയന്ത്രണം നഷ്ടമായ സ്കൂട്ടർ ഇന്നോവയ്ക്ക് പിന്നിലിടിച്ച് സഹോദരങ്ങൾക്ക് ദാരുണാന്ത്യം

കോട്ടയം: മണിമലയിൽ നിയന്ത്രണം നഷ്ടമായ സ്കൂട്ടർ ഇന്നോവയ്ക്ക് പിന്നിലിടിച്ച് സഹോദരങ്ങൾക്ക് ദാരുണാന്ത്യം : മരിച്ചത് മണിമല സ്വദേശികളായ യുവാക്കൾ

കോട്ടയം : നിയന്ത്രണം വിട്ട ഇരുചക്രവാഹനം ഇന്നോവയ്ക്ക് പിന്നിൽ ഇടിച്ച് സഹോദരങ്ങളായ യുവാക്കൾക്ക് ദാരുണാന്ത്യം. കോട്ടയം മണിമലയിലാണ് ഇരുചക്ര വാഹനം അപകടത്തിൽപ്പെട്ട് യുവാക്കൾ ദാരുണമായി മരിച്ചത്. സ്കൂട്ടർ യാത്രക്കാരായ മണിമല പതാലിപ്ളാവ് കുന്നുംപുറത്ത് താഴെ യോഹന്നാൻ മാത്യുവിൻ്റെ മകൻ ജിൻസ് ജോൺ (31), സഹോദരൻ ജിസ് (25) എന്നിവരാണ് മരിച്ചത്.

ശനിയാഴ്ച വൈകിട്ട് കറിക്കാട്ടൂരിനും മണിമലയ്ക്കുമിടയ്ക്കാണ് അപകടമുണ്ടായത്. ഇരുവരും സഞ്ചരിച്ച സ്കൂട്ടർ മണിമല ഭാഗത്തേക്ക് പോകുകയായിരുന്ന ഇന്നോവയ്ക്ക് പിന്നിൽ ഇടിക്കുകയായിരുന്നു. മുന്നിൽ പോയ ഇന്നോവ ബ്രേക്ക് ചെയ്തതിനെ തുടർന്ന് ഇവരുടെ സ്കൂട്ടർ പിന്നിൽ ഇടിച്ചുകയറുകയായിരുന്നുവെന്ന് പോലീസ് പറയുന്നു.

അപകടത്തിൽ പരിക്കേറ്റ ഇരുവരെയും കോട്ടയം മെഡിക്കൽ കോളേജ് ആശുപത്രിയിൽ എത്തിച്ചു. ജിൻസ് അർദ്ധരാത്രിയിലും, ജിസ് പുലർച്ചെയുമാണ് മരിച്ചത്. അപകടത്തിന്റെ സിസിടിവി ക്യാമറ ദൃശ്യങ്ങൾ പോലീസ് ശേഖരിച്ചു. മരിച്ച യുവാക്കളുടെ മൃതദേഹങ്ങൾ ഇൻക്വസ്റ്റ് പോസ്റ്റുമോർട്ടം നടപടികൾ പൂർത്തിയാക്കി ബന്ധുക്കൾക്ക് വിട്ടുനൽക്കും. സംഭവത്തിൽ മണിമല പോലീസ് കേസെടുത്തു.