മുണ്ടക്കയം പഞ്ചായത്തിലെ പുഞ്ചവയലിൽ എട്ടുപേർക്ക് മഞ്ഞപ്പിത്തം സ്ഥിരീകരിച്ചു.
പ്രതീകാൽമക ചിത്രം
മുണ്ടക്കയം: മുണ്ടക്കയം പഞ്ചായത്തിലെ പുഞ്ചവയലിൽ എട്ടുപേർക്ക് മഞ്ഞപ്പിത്തം സ്ഥിരീകരിച്ചു. ജാഗ്രതാനിർദേശവുമായി ആരോഗ്യവകുപ്പ് രംഗത്ത്. പുഞ്ചവയൽ ടൗണിൽ സ്വകാര്യ വ്യക്തിയുടെ കിണറ്റിൽനിന്നു വെള്ളം കുടിച്ച ഒരു കുടുംബത്തിലെ മൂന്നുപേർക്കും സമീപത്തെ കടയിലുള്ളവർക്കും ഉൾപ്പെടെ എട്ടുപേർക്കാണ് മഞ്ഞപ്പിത്തം സ്ഥിരീകരിച്ചിരിക്കുന്നത്. ഒരേ കിണറ്റിൽനിന്നു തിളപ്പിക്കാത്ത വെള്ളം ഇവർ ഉപയോഗിച്ചതായി കണ്ടെത്തിയിരുന്നു. തുടർന്ന് ആരോഗ്യവകുപ്പിന്‍റെ നേതൃത്വത്തിൽ കിണർ ക്ലോറിനേഷൻ നടത്തി ശുചീകരിക്കുകയും മേഖലയിൽ ജാഗ്രതാനിർദേശം നൽകുകയും ചെയ്തു. കൂടാതെ സമീപത്തെ കിണറുകളും ക്ലോറിനേഷൻ നടത്തി. പ്രദേശത്ത് ലൈസൻസ് ഇല്ലാതെ പ്രവർത്തിക്കുന്ന രണ്ട് സോഡാ ഫാക്ടറികൾ ആരോഗ്യവകുപ്പ് അടപ്പിച്ചു. ആശാപ്രവര്‍ത്തകര്‍ ഭവനസന്ദര്‍ശനം നടത്തി ജാഗ്രതാനിര്‍ദേശങ്ങള്‍ നല്‍കിവരികയാണ്. തുടര്‍ന്നു ജില്ലാ മെഡിക്കല്‍ ടീം, ഗ്രാമപഞ്ചായത്ത് അംഗങ്ങള്‍, ആരോഗ്യവകുപ്പ് പ്രവര്‍ത്തകര്‍ എന്നിവരുടെ നേതൃത്വത്തിൽ മുണ്ടക്കയം പഞ്ചായത്തിൽ അവലോകനയോഗം നടത്തി. മുണ്ടക്കയം കുടുംബാരോഗ്യകേന്ദ്രം സൂപ്രണ്ട് ഡോ. സീന എസ്. ഇസ്മായില്‍, ഹെല്‍ത്ത് ഇന്‍സ്‌പെക്ടര്‍ സന്തോഷ് മാത്യു, ജൂണിയര്‍ ഹെല്‍ത്ത് ഇന്‍സ്‌പെക്ടര്‍മാരായ ഉല്ലാസ് കുമാര്‍, എസ്. സ്മിത എന്നിവരുടെ നേതൃത്തിലായിരുന്നു പരിശോധന നടത്തിയത്. മേഖലയിൽ നിരീക്ഷണം ശക്തമാക്കാനും ആരോഗ്യവകുപ്പ് തീരുമാനിച്ചു.
